الضيف

ضيف بيلف ويدور ويزور كل بيت وكل نفس ضيف بيدخل على الناس من غير استئذان
ضيف عمره ما كان خفيف ولا حافظ على شعور الناس اللي هوه داخل عليهم
ضيف بيبوظ القاعدة الحلوة واللمة الجميلة , مش بيهمه هوه رايح لمين حتى لو
ملك , وزير , غفير , شحات ممكن تختلف الطرق لكن الضيف واحد بس

غريب اوي عمره ما يحاسب على احساسك وكأنه قاصد يجرحك كأنه قاصد يوجعك
بيألمك بيحطمك وممكن يكسرك الوحيد اللي بيجي اسمه ساعتها بنقول ( بعد الشر)
يعني هوه ايه ؟ سنة الحياة ولا لعنتها ؟

هوه اللي فرق ولسه هيفرق بين أب وأبنه وهوه لسه متعلمش يمشي
هوه اللي فرق ولسه هيفرق بين أم وبيتها وهيه لسه مفكتش ضافيرها
هوه اللي فرق ولسه هيه هيفرق بين الاصحاب وهمه محتاجين بعض

بس هوه احنا ليه بنكره هوه مش لما يزورنا زي ما زار اللي قبلنا
هيجمعنا بيهم تاني , يعني الابن هيشوف ابوه والبنت هتشوفه امها
يعني الضيف ده هيجمعنا باللي بنحبهم تاني اهه طيب ما حنا منكرهوش

بس لو فكرنا هوه فينا حد بيحبه ؟ فينا حد مستنيه؟ فينا حد عاوزه يزوره؟
متهيألي قليل..... صح؟ اه صح

اصل اللي بيحبه ده لازم يبقى ناجح في حياته شغال كويس عنده سابقة اعمال
مليانه بعمل الخير اللي بيحبه ده لازم يكون مؤمن ان الله الواحد الاحد هوه
الحكيم اللي له حكمه في كل شئ حتى في الفراق
ربي وربك ورب الكون هوه المطلع العالم بيك وبيا وبكل شئ

اصل اللي يحبه ده لازم يعمل حاجات كتير كويسه تخليه مش خايف منه
ولو جاله هوه مستنيه لانه قدر وهيجي هيجي بس لازم الاستعداد ماهوه
مش هيبقى خايف منه اصله عارفه وفاهمه ومستعدله هوه نفع نفسه واهله
وبلده هوه نشر الخير ومعملش الشر هوه علم الناس شئ كويس في حياته
هوه ارتقى بدينه وعلا اسم بلده هوه ربى ولاده وعلمهم عشان يكونوا
نفع لبلده ودينه من بعده

اصل اللي بيحبه مش هيخاف يقول اسمه ومش هيقول ( بعد الشر)
اصل اللي بيحبه هيقدر عليه ولو جاله وشه هينور ويترسم على وشه
ابتسامة الرضا
اصل اللي بيحبه حافظ وفاهم ان ( انا لله وانا اليه راجعون)

اخبط دماغك في الحيط

من كام شهر كتب ربنا عليا ان المترو يبقى وسيلة مواصلاتي شبه اليوميه ومش هعترض ولا هقول لاء
قدر الله وماشاءفعل ومش هتنطط واركب تاكسي عشان بصرحه مشواري طويل وبعدين لما فكرت لقيت
ان انا كنت دايما بنصح الناس انها تركب المترو لو مشوارها طويل وده لانه اسرع وسيلة مواصلات في مصر
يعني من الاخر لو رايح مكان بعيد وعاوز تظبط معادك اركب المترو اكيد المترو احسن حل عشان مواعيده تمام
لكن انا لقيت ان المترو في حاجات احلي من كده بكتير تخليك تركب المترو وتحببك فيه لاء ده انت ممكن تبات فيه
والحاجات دي اثبتت ان مترو الانفاق المصري هوه احسن مترو في العالم وده مش كلامي ده من اللي حاصل فيه

مترو الانفاق المصري اول مترو فيه عرض ازياء
تنزل الاخت العسل من علي السلم لرصيف المحطة بطرقع بكعب جزمتها اللي طوله 50 سم من التوحيد والنور
وتفضل تتطرقع من اول الرصيف لاخره وده طبعا مع الكات ووك اللي تجنن تحسها ماشيه علي الريد كاربت العسل
مترو الانفاق المصري اول مترو فيه تفرقة عنصرية
وده طبعا حلو اوي للستات يعني المترو متقسم عربيات للسيدات ولو سولت لك نفسك وغلط ودخلت عربيتهم خد بأه صويت ويالهوي ويا خرابي وتتقفش
وتدفع غرامه مع ان السيدات عادي يعني بيركبوا عربيات الرجاله ومفيش مشكلة
مترو الانفاق المصري الوحيد اللي بيدرا بنظرية التراشق
وهيه نظرية خاصة بينا شويه وهيه بتقوم علي الرشقان يعني تيجي تنزل المحطة اللي عاوزها او لسه هتركب يبقي استعد للمعركة هتلاقي رجل واحد في بطنك
او في مكان تاني الله اعلم !! ايده في وشك مفيش مانع من كوووع في عينك ده غير ان كل الناس بدوس علي رجلين كل الناس ومفيش حد بيقول لحد انا اسف
وده عشان يبقي فيه تلاحم بين كل فئات الشعب
مترو الانفاق المصري الوحيد اللي مش محتاج معطر جو
حد يجرأ ويسأل ليه مش محتااج ؟! عشان هوه قائم بحد ذاته رائحته نابعه من جواااه مفيش حد يعرف حاجه فيه اسمها دوش الصبح قبل النزول
وده ليه؟؟؟؟ عشان تبقي حتي ريحتنا واحده مفيش فرق بين انسان واخوه ال
مترو الانفاق المصري الوحيد اللي بيحس علي المشاركة الاجتماعية
طبعا ده مش المترو بس ده اي وسيلة مواصلات عامة في البلد والمترو اخص تلاقي اتنين بيتكلموا في حوار ان مثلا هيطلق مراته وتلاقي العربية اللي جنبه
سمعه هوه هيطلقها ليه تلاقي واحد طلع منين متفهمش يقولوه لاء لازم تتطلقها ازاي تعمل كده وواحد تاني لاء حرام عليك وواحده تقوله يا اخويا حرام عليك
يعني هيه عملت ايه بس , وانت هتسمع يعني هتسمع من الاخر معا ضد الانطوائية
مترو الانفاق المصري الوحيد اللي فيه جيم
يعني تيجي علي الصبح تلاقي السلم الكهربا بايظ تنزل تلاقي المكنة اللي بتحط فيها التذكرة بايظه برضه يقولك راجل لطيف كده بشنب لطيف برضه نط من عليها يا استاذ
تنط تلاقي المترو هيمشي تجري تلحقه تلاقيه قفل علي رجل راجل كبير تلاقي نفسك بتشد باب المترو انته وواحد زيك ابن حلال عشان رجلين الراجل متتقطعش وبكده
تكون عملت سويدي لليوم كله

كل دي دوافع تخليك تركب المترو مما فيه من فوائد ليك واللي حواليك ...... اسف انا كداب كل دي حاجات تخليك تكرهه بس حتي لو كرهته هتعمل ايه
سألت كام واحد كده من الناس المحترمة وليها نظرة خاصة طيب الناس تعمل ايه قالولي حاجة مهمه جدا االعيب مش عيب المترو العيب عيب اللي بيركبوه
وهيعمل ايه الغلبان لو كان بينطق كان ..... و......و...... بس الحمدلله هوه اخرس ولا حول له ولا قوة ولو اللي بيركبوه محترموش نفسهم يبقي انت
قدامك حل من الاتنين...................اخبط دماغك في الحيط

مجنون

بتقرب على 6 الصبح وانا لسه قاعد زي مانا كل حاجة تسلي عملتها
كلمت صحابي واتفرجت على التلفزيون اتخنقت مع اخويا واقفشت على صاحبتي
حفظت الفيس بوك وكل الافلام اللي عندي وبرضه زهقان ومش طايق نفسي
وانا بقلب فب التلفزيون كده لقيت مسلسل عربي قلت اتفرج ويانا يا هوه
الغريب بأه ان حصل حاجه غريبه سمعت احسن حوار في حياتي
هوه الحوار كان واحد بيكلم نفسه وهوه واقف على باب دكتور نفساني
كان بيقول ان اصعب لحظة في حياة الانسان لما يكون داخل على دكتور نفساني
بيبقى حاسس انه هيقعد قدام واحد ميعرفوش عريان زي ما ولدته امه ومش هيستر نفسه
عشان يبان على حقيقته ويقدر يقوله يعمل ايه, اول مرة حوار في مسلسل عربي يشدني
ويخليني افكر هوه الواحد بجد محتاج لدكتور نفساني؟
هوه انا جوايا عقد ومحتاج حد يفكها؟
ولا انا كويس والدنيا حلوة وانا بس عاوز انام؟
المهم بعد ما فكرت لقيت ان انا ممكن اكون محتاج لدكتور نفساني بجد وان انا مش لوحدي
لاء ده في ناس كتير كده
بس انا مش هروح لدكتور نفساني ولا ناس كتير هتروح عشان مش شايفه انها تعبانه من حاجه
والاهم ان مفيش حد قالها انها مش طبيعية
الانسان الطبيعي لازم يعمل حاجه مهمه جدا يفكر في عيوبه والحاجات اللي محدش يعرفها عنه
نفسيته, الحاجات اللي بيعملها بينه وبين نفسه , المهم اي حاجه ميحبش الناس تعرفها عنه
ويشوف لو الناس عرفت الحاجات دي هتقول عليه ايه؟؟؟؟؟؟؟؟؟؟؟؟؟؟؟؟؟؟؟؟؟؟
مجنون ولا عاقل ولا منفسن ولا جحيم من جوا ولا طيوب اوي ولا كوكو خالص او اي حاجه
من الحاجات الطيفة دي
عمنا يوسف شاهين كان بيقول دايما ان الواحد لو بص للكاميرا هتديلوا ضهرها ولو مبصلهاش
هتديلوا وشها
انته كده لو بصيت لعيوبك هتديك ضهرها لو مبصتلهاش هتديلك وشها وهتكبر وهتبقى زباله
مش محتاجه فلسفه ولا محتاجه دكتور نفساني محتاجه بس بصه لنفسك افهم نفسك
متعملش اللي تخاف منه واعمل اللي متخفش منه.

لا ارى لا اسمع لا اتكلم

في يوم ذي كل يوم جالي يوسف وباين عليه مضايق كالعاده وكالعاده برضه حصل الاتي:
أنا : مالك يا يوسف؟
يوسف:أبويا ( ظهر الحزن على وجهه)
أنا: ماله يابني خير
يوسف:ياعم متخفش أوي كده أبويا كويس مفيهوش حاجه
أنا:امال ايه بس قلقتني والله
يوسف:الراجل ده محيرني أوي يا أخي
أنا: محيرك ازاي يعني؟
يوسف:ولعلي سيجارة الاول
أنا:اتفضل يا معلم
يوسف:اوقات بحس ان ابويا عاوز يطبق معايا نظام( لا اري لا اسمع لا اتكلم)
أنا:عاوزك تبقى اهبل يعني
يوسف:ياعم انته بتضحك , بجد اوقات بحس ان ابويا ده احسن راجل في العالم واعظم واحد في الدنيا
وان مفيش حد زيه وأوقات..........
أنا: أوقات ايه يا يوسف فوء يابني ده أبوك , ابوك راجل كويس جدا ومتدين وكفايه اخلاقه مع الناس كلها
ايه بأه اللي مخلي كل الشك ده جواك؟
يوسف:ياعم عندك النهارده مثلا صحيت من النوم الساعه 12 وأول ما شفني الدنيا اتقلبت وقعد يزعق
ويقول : مش قلنا نصحي بدري يوم الجمعه مش قلنا نصحى نقرا شوية قران ونصلي و,و,و,
أنا:عادي يعني يا يوسف الراجل بيتكلم في الصح بيني وبينك
يوسف: مانا عرفت بعدها ان كان لسه صاحي من ربع ساعه تقول ايه انته بأه؟
أنا: مش عارف بصرااحه
يوسف:عارف بأه ايه المشكلة؟ المشكلة ان الحوار ه فكرني بكام حاجه كده اغرب من بعض
الحاجات دي خلتني في الحيرة اللي انت شايفها دلوقت.
أنا: حاجات ايه دي كمان؟
يوسف: أبويا وانا صغير كان بيمسكني يموتني من الضرب عشان الكدب وكانت الدنيا تتقلب لو كدبت مرة
مع اني كنت عيل صغير مع اني فاكر كويس انه اوقات كان له صحاب يتصلوا بيه وابويا يخليني ارد
واقولهم انه مش موجود او نايم مع انه كان بيكون حي يرزق بيأزأز لب جنبي
أنا: لا ياراجل
يوسف: اه والله بس ده خالاني عاوز اسأل سؤال : هوه ده مش كدب برده ؟
أنا: اه كدب يا يوسف
يوسف : طب سيبك من ده الحوار الاغرب بأه لما ابويا عرف زمان اني بيشرب سجاير الدنيا اتقلبت
ثورة 23 يوليو قامت في البيت , ياعم ده ابويا كان هيطلق امي فيها وبعدها قعد معايا وبهدوء قالي:
بص يا يوسف السجاير دي مضرة جدا وبدمر الصحة وانته ياحبيبي لسه صغير حرام عليك صحتك
ربنا هيسألك على صحتك دي يوم القيامه ضيعتها في ايه.
عارف بأه بعدها عرفت ان ابويا كان بيشرب سجاير من وهوه عنده 15 سنه مش بذمتك حاجه تضحك
أنا: أبوك برضه يا عم وخايف عليك وبعدين الراجل بينصحك وانته بأه تاخد بالنصيحه او لاء دي حاجه
ترجعلك.
يوسف: ماهوه لو احنا حطينا كل حاجه تحت بند(خايف عليك)يبقى ده معناه ان انا المفروض ميبقاش ليه
عين اشوف بيها كل اللي بيحصل قدامي من الناس اللي بينصحوني وهما بيعملوا الغلط ده قدامي
وميبقاش ليه ودن اسمع بيها كل الكلام المتناقض مع افعال مطلوب مني معملهاش وميبقاش ليا لسان
أقول لاء على كل الحاجات اللي شايفها ومطلوب مني اسكت عليها
أنا: يوسف ... قلقتني انته بتتكلم على ابوك ليه كده؟
يوسف: انا احط رقبتي تحت رجل ابويا يدوس عليها لو طلب مني وده مش كلام ولا شعارات بس
العتاب اللي في قلبي لابويا من حبي ليه مش كره ليه
أنا: عارف يا يوسف كلامنا ده كله مكنش هيبقى له لزمة لو كان ابوك نصحك بكل
الحاجات دي وغيرها وهوه كان بيعمل بيها بس انته كمان انسان متعلم ولك دماغك اللي
تفكر بيها انته عارف ان الكدب مثلا حرام يبقى متكدبش حتى لو ابوك عمل كده مفيش حد
هيشيل زنب حد ولا هيتحمل نتيجة غلط حد بس اقولك على حاجه انته كلامك فيه من الصح برضه
لازم ميبقاش فيه تناقض بين النصيحة والفعل ولا بجد يبقى نظامنا زي مانته قلت
(لا اري لا اسمع لا اتكلم)

انا منافق

في يوم زي كل يوم جالي يوسف وباين عليه انه مضايق كالعادة وكالعاده برضه حصل الاتي:
أنا:مالك يا يوسف؟
يوسف:أختي
أنا: خير يا بني انته كل يوم تخوفني ويطلع في الاخر مفيش حاجه ارغي ياعم
يوسف:مش ناقصه هزار والنبي
أنا:في ايه يابني مالك؟
يوسف: في مصيبه
أنا: يا عم ماتنطق في ايه؟
يوسف: اختي بتحب!!!!!
أنا:نعم
يوسف: زي ما سمعت
أنا: طب و أيه؟
يوسف : ايه ايه بس انا مش عارف اعمل ايه؟
أنا: هوه اللي مش عارف تعمل ايه؟ وايه المصيبة في كده ؟ انته شوفت اللي بتحبه ده؟
يوسف: اشوفه اهبب بيه ايه؟ وبعدين انا سبتها ومشيت قبل حتى ماهيه تكمل كلامها بس لما ارجعلها البيت
والله العظيم لهوريها .
أنا: توري مين يابني انته انته مجنون؟ مش لما تفهم الموضوع الاول وتعرف هوه مين وظروفه ايه
وطالما اختك جتل وحكتلك يبقى اكيد البنت مش عاوزه تعمل حاجه من وراكم
يوسف: بقولك مفيش حاجه اسمها كده يعني تحب وترتبط والكلام الفارغ ده وشويه شويه الاقيه بيكلمني
ويقولي اختك موجوده ولا لاء ماخلاص بأه احنا بقينا شباب.... ولا بلاش
أنا: اهدا شويه وفكر الاول, في ايه يا يوسف؟ ما انت مصاحب ومرتبط وبدل المرة 100 مرة
يوسف:بس انا عمري ماضحكت على بنت ولا لعبت بيها وصاحبتها يومين وخلاص انا كنت
لما برتبط كنت برتبط ونيتي اني أكمل بس الظروف هيه اللي مكنتش بتساعد ومكنش بيحصل نصيب
أنا: طيب سؤال هيه اللي البنت اللي انته مرتبط بيها دي هتتجوزها؟
يوسف: اه طبعا ما انت كل حاجه على ايدك انا لو لفيت الدنيا دي كلها مش هلاقي زيها
أنا: تعرفها من اد ايه؟
يوسف: يعني من 3 سنين من ايام الجامعه انته ناسي ولا ايه؟
أنا: لاء انا مش ناسي انته اللي ناسي يا يوسف ان البنت دي زيها زي اختك
ورضيت عليها اللي انت مش راضيه دلوقتي على اختك
يوسف: لاء الموضوع مش كده الموضوع ان انا مش قادر اقتنع بفكرة ان اختي تكون بتحب واحد وتخرج معاه
و و و لاء مش عاوز افكر اصلا
أنا: لاء فكر واقعد مع الولد ده وشوفه وانت متهيألي هتعرف تفهم اذا كان الولد ده تمام ولا لاء
وانته مهمتك انك تقدم النصيحة لأختك واختك عاقله هتفهم وتقدر رأيك
يوسف: ايه ياعم اللي انته بتقوله ده اقعد مع مين ناقص كمان اجيبه البيت وبدل بقى
ما يخرجوا مع بعض بره يجيوا يقعدوا عندنا في البيت اصلها خربت خلاص
أنا: يوسف انته منافق
يوسف: انا منافق؟؟؟؟؟؟؟؟
أنا: اه منافق عشان انته كنت بتعمل كده بالظبط وكنت بتقول الكلام ده وكنت بتقول البنت المحترمه
هيه اللي اهلها يعرفوا صحابها ولاد او بنات ومتخفش من حاجه ولو حبت في يوم من الايام
تبقى واضحه وصريحة مع اهلها ولو اهلها شافوا حاجه غلط في اصحابها دول تحترم
رأي اهلها وتتناقش معاهم ولما يتفقوا ينفذوا اللي اتفقوا عليه وهيه تكون مقتنعه بده
عشان اهلها اكيد خايفين عليها وشايفين ابعد منها وده بعد المناقشه وممكن يحصل
العكس الاهل هما اللي يقتنعوا بكلامها وبكده الامور تبقى واضحه وصريحه
الكلام ده انته قلته وانا كنت قاعد صح؟
يوسف: اه صح انا قلت كده بس خوفي على اختي هوه اللي بيحركني
بس انا لازم فعلا اقعد معاها وافهم الحوار ده كله واشوف الشاب ده
نظامه ايه يارب يطلع كويس
أنا: ومتبقاش منافق يا يوسف واعمل اللي انته كنت بتقوله ومقتنع بيه
يوسف: (ابتسم) ان شاء الله.

نفسي اشوفك زيه

في يوم ذي كل يوم جالي يوسف وباين عليه مضايق كالعاده وكالعاده برضه حصل الاتي:
أنا : مالك يا يوسف؟
يوسف : أمي

أنا:مالها يبني خير
يوسف:لالا متقلقش هيه كويسه بس النهارده قعدت تقولي كلام غريب اوي يااخي خوفتني من نفسي والله
أنا: ايه يعني قالتلك ايه مش فاهم؟
يوسف: النهارده كنا قاعدين نتفرج على التلفزيون مع بعض عادي جدا زي كل يوم وكنت جايب برنامج كده كان جايب ابوتريكه
أنا: وايه المشكلة يعني هوه ده مش حبيبك
يوسف: اه ياعم حبيبي انا قلت حاجه بس امي كل ما تشوفه تقعد تقول بسم الله ما شاء الله يارب يا يوسف اشوفك زيه
أنا: ده علي اساس ان مامتك شايفك بتلعب كورة يعني ولا ايه
يوسف: لاء يابني افهم امي لما بتشوف ابوتريكه وهوه بيتكلم عن اهله وانه اد ايه بيصلي وانه متدين تقوم قايلالي البؤين دول
أنا: وايه المشكلة في كده
يوسف : ياسيدي انا معنديش مشكلة بس اللي حصل بعد كده هوه اللي مشكلة
أنا : ايه اللي حصل؟
يوسف: بعد شويه قلبت وجبت قناة تانيه لقيت مصطفى حسني الداعية الشاب ده عارفه؟
أنا: اه طبعا يابني
يوسف: بس ياسيدي أول ما أمي شافته طلعت نفس الكلمه, سيبك من كده كمان قلبت بعدها جه واحد تاني
علي قناة تانية اسمه معذ برضه داعية وبرضه أمي أول ما شفته والله يابني طلعت نفس الكلمه
المشكلة مش في حاجه المشكلة ان انا ولا مرة قلت يارب !!!!!
أنا: يوسف مش يمكن انت عاوز تبقي ليك شخصية لوحدك والناس تتمني انك ولادهم يبقوا زيك والكلام بتاع الكتب ده
يوسف: ضحكتني والله انا بتكلم جد تفتكر ليه انا مقلتش يارب؟ هوه انا مش عاوز ابقي زي الناس دي ولا انا ربنا
مش راضي عني,حتي الدعوة انه يهديني مش طالعه مني!!
أنا : بص يا يوسف أنا مش هفتي وأقولك اي كلام بس اللي انا عارفه ان الواحد بيتمني من كل قلبه اللي هوه بيحبه بجد
يعني انته عارف كويس اوي ان الناس دي مش بتحب ولا تتمني اللي انت تحبه وتتمناه , يعني الناس دي مش عاوزه
أكيد تسافر بره وتقضيها , الناس دي مش بتروح حفلات ولا بترقص , الناس دي لما بتتجوز مش بتعمل فرح وتجيب ناس تغني
الناس دي مش بتسمع ااغاني ولا بتتفرج علي كليبات , الناس دي مش بتشرب سجاير ولا بتسهر كل يوم للفجر في الشارع
الناس دي ليها فرحه تانيه , الناس دي فرحتهم في صلاتهم , فرحتهم في نجاحهم , فرحتهم وسعادتهم لما يعملوا حاجه ترضي
ربنا مش لما يعصوا ربنا يا يوسف!!
يوسف: طيب وانا فين من كل ده انا عاوز افرح الفرحه اللي ليها طعم مش عاوز الفرحه اللي بتيجي وتروح في ثواني
انا عاوز الحلال اللي يدوم
أنا: يبقي مش باقي كتير يا يوسف انت علي اول الطريق انت تقدر تلاقي حياتك وسعادتك فين وتحققها
يوسف: ان شاء الله اللي فيه الخير يقدمه ربنا, بس انت عارف انا نفسي في ايه بجد؟
أنا : نفسي أمي تفرح بيه ولما تشوف حد من الناس دي بعد كده تقول انا ابني زيه.

حلم شارع الهرم

حلمت في مرة حلم غريب اوي وانا عارف ان في فرق بين الحلم والرؤية وان الحلم من الشيطان والرؤيا ليها شروط يعني من الاخر ده كان حلم واكيد اكيد اكيد من الشيطان
بس اللي كان نفسي اعرفه هوه الواحد لما بيحلم بياخد اد ايه في الحلم يعني لو الحلم منظرين على كام كلمة على بنت حلوة يطلع اد ايه؟ دقايق يعني ولا اد ايه؟ مش مهم
المهم ان الحلم اللي انا حلمته كان مدته يوم كامل فا مش معقول انا نمت يوم كامل بس المهم اني حلمت, حلمت ان شارع الهرم ده بقى جمهورية مستقلة بذاتها وان انا مسكت
الحكم فيه واول الحلم خير الله اما اجعله خير انا واقف في ميدان الرماية ( قبل التعديل) في النص والناس واقفه قدامي من الرماية لحد نفق الهرم وانا شايفهم كلهم ووقفت وسكان شارع الهرم
سلموني مفتاح الجمهورية بتاعتنا وقلت القسم وكان فاضل اني اقول كلمتي:
أيها الشعب الفاضل شعب الهرم العريق .... شعب الشارع الذي عانا مرارا وتكرارا من الأثم والعدوان( بتوع فيصل اللي مطلعين عنينا )
أيها الشعب الذي ساءت سمعته من بداية ظهوره في داخل مصر قبل البلدان الشقيقه.( طبعا الناس فاهمه الكباريهات وشغل دي تبغي مصاري اديها , وايش تبغي يا زين)
أيها الشعب الذي اصاب نصفه بالخذي والهوان عندما تقول لصديقك في الدراسه او في العمل انك من شارع الهرم يرد عليك ويقولك ( مفيش حاجه علينا)
أيها الشعب الذي عانا من المرور في أوقاتا غريبة زي 3 و4 الفجر عشان الكباريهات مركون قدامها صف رابع
أيها الشعب الذي عانا من سائقي الميكروبصات ( الفولكس) من كسرهم الطريق عليك وغلو الاجرة كل 50 متر ب نص جنيه ...... اني اهنأكم أعدااااااااااااااااااااااااااااااااااااااااااام لكل سائقي الميكروبصات أعداااااااااااااااااااااام
(تصفيق حاااااااااااااد )
أيها الشعب الذي عانا ومازال يعاني من رواد كايرو مول ومن سينما كايرو مول المليئة بسكان فكيهه( منطقة في الطالبية)
أيها الشعب الذي عانا من شبراوي العريش اللي الناس مصره انها تاكل من عنده مع ان بتاع الطوابق احلى وده بس عشان البنات اللي بتقف عند سينما الزعيم لا زعيم بعد اليوم لا زعيم
( تصفيق حاااااااااااااد)
أيها الشعب الذي عانا من قسوة سنترال اللي في شارع حسن محمد والمريوطية.... قررت الجمهورية الهرميه تأميم شركة المصرية للاتصالات شركة مساهمة هرميه
(تصفيق حااااااااااااااد)
أيها الشعب الذي عانا من السجل المدني اللي جنب كايرو مول لا يوجد بطاقات شخصية بعد اليوم لن يزل المواطن الهرمي بعد اليوم( يلعن دي بطاقه اللي هتقوفلها كل يوم 15 ساعه عشان تطلعها وفي الاخر تظبط اي حد ب20 جنيه)
(تصفيق حااااااااااد)
أيها الشعب الذي عانا من نفسه اني أهنأكم كل من نزل اليوم ووقف أمامي اني منكم واليكم روحي فداء لكم دمي فداء لكم فلوسي فداء لكم بس اشطه احنا ممكن ( نتشييير ) مع بعض في بيتزا من اليكس توب
( تصفيق حااااااااااااد)
أيها الشعب العظيم العريق لكم مني كل الاحترام والتقدير لكم مني كل الطاعه والمشاركه في الرأي بس اللي هيقفش هطلع عين..............................................
وقبل ما اكمل الكلمة ظهر واد من اللي كان واقفين ومستنين اني اغلط من اللي بين فيصل والهرم الاجئين السياسين دول وطلع من جيبه عصاية بلياردو ورماها في السما وانا شايفها طاية فوق فوق فوق واتريها جايه
عليا وترررررررررررشق في قلبي وانذف كثيرا واقوم اقف مرة اخرى واقول :
مش مهم انا اموت المهم ان انتوا تعيشوا المهم ان انتوا ميحصلكوش حاجه هاتوا ميت عصاية بلياردو وارشقوها في قلبي ولا ان شارع الهرم يحصلوا حاجه
انا فدااااكم يا رجاله انا فداااكم يا رجاله
وانا بقول الكلام العظيم ده لقيت شباين زي الورد بيشلوني وبيقولوا ده كان عيل مقرف عمال رغي رغي رغي وهوه حمار اصلا ولا فاهم حاجه عيل بوء على الفاضي
وصحيت من النوم وانا مش واجعاني عصاية البلياردو اللي كان وجعني كلام الشباين اللي زي ال ........
بس لما فوقت وشربت الشاي قلت وانا مالي ما العيال دي عندها حق اما انا صحيح عيل راغاي اووووووووووووووووووووووووووووووووووووووي .

الضيف

ضيف بيلف ويدور ويزور كل بيت وكل نفس ضيف بيدخل على الناس من غير استئذان
ضيف عمره ما كان خفيف ولا حافظ على شعور الناس اللي هوه داخل عليهم
ضيف بيبوظ القاعدة الحلوة واللمة الجميلة , مش بيهمه هوه رايح لمين حتى لو
ملك , وزير , غفير , شحات ممكن تختلف الطرق لكن الضيف واحد بس

غريب اوي عمره ما يحاسب على احساسك وكأنه قاصد يجرحك كأنه قاصد يوجعك
بيألمك بيحطمك وممكن يكسرك الوحيد اللي بيجي اسمه ساعتها بنقول ( بعد الشر)
يعني هوه ايه ؟ سنة الحياة ولا لعنتها ؟

هوه اللي فرق ولسه هيفرق بين أب وأبنه وهوه لسه متعلمش يمشي
هوه اللي فرق ولسه هيفرق بين أم وبيتها وهيه لسه مفكتش ضافيرها
هوه اللي فرق ولسه هيه هيفرق بين الاصحاب وهمه محتاجين بعض

بس هوه احنا ليه بنكره هوه مش لما يزورنا زي ما زار اللي قبلنا
هيجمعنا بيهم تاني , يعني الابن هيشوف ابوه والبنت هتشوفه امها
يعني الضيف ده هيجمعنا باللي بنحبهم تاني اهه طيب ما حنا منكرهوش

بس لو فكرنا هوه فينا حد بيحبه ؟ فينا حد مستنيه؟ فينا حد عاوزه يزوره؟
متهيألي قليل..... صح؟ اه صح

اصل اللي بيحبه ده لازم يبقى ناجح في حياته شغال كويس عنده سابقة اعمال
مليانه بعمل الخير اللي بيحبه ده لازم يكون مؤمن ان الله الواحد الاحد هوه
الحكيم اللي له حكمه في كل شئ حتى في الفراق
ربي وربك ورب الكون هوه المطلع العالم بيك وبيا وبكل شئ

اصل اللي يحبه ده لازم يعمل حاجات كتير كويسه تخليه مش خايف منه
ولو جاله هوه مستنيه لانه قدر وهيجي هيجي بس لازم الاستعداد ماهوه
مش هيبقى خايف منه اصله عارفه وفاهمه ومستعدله هوه نفع نفسه واهله
وبلده هوه نشر الخير ومعملش الشر هوه علم الناس شئ كويس في حياته
هوه ارتقى بدينه وعلا اسم بلده هوه ربى ولاده وعلمهم عشان يكونوا
نفع لبلده ودينه من بعده

اصل اللي بيحبه مش هيخاف يقول اسمه ومش هيقول ( بعد الشر)
اصل اللي بيحبه هيقدر عليه ولو جاله وشه هينور ويترسم على وشه
ابتسامة الرضا
اصل اللي بيحبه حافظ وفاهم ان ( انا لله وانا اليه راجعون)